#Apple#WWDC21#懶人包

蘋果Apple喺稍早時間嘅年度開發者大會上，正式公佈咗最新作業系統iOS 15，今日就同大家介紹下到底會有咩改進同新功能喇！

iOS15將會為大家提供一個更好嘅Facetime體驗。佢新增嘅「空間音訊」功能，可以令用家通話時嘅聲音聽落更加自然，亦都可以分隔背景聲音同用家講嘢嘅聲音，令通話質素更好。佢仲加入咗「人像」模式，等用家可以喺視像通話時將身後嘅背景模糊，令畫面對焦喺用家身上。另外，用家Facetime嘅時候都可以使用「SharePlay」功能，同朋友一邊視像通話，一邊同步聽歌、睇戲、瀏覽網站等等。

iOS15亦都加入「Focus」功能，幫助用家管理好通知內容。呢個功能會根據用家與唔同App之間嘅互動，將通知自動按照優先次序排位，方便用家可以先睇到更重要嘅訊息。用家喺設定中都可以選擇喺某段時間內不被通知滋擾，或者喺工作嘅時候只接受某幾個App彈出通知等等。

喺相機方面，iOS15將會支援「Live Text」功能，將相片入面見到嘅文字逐一辨識，並轉化成可編輯嘅文字檔案。用家亦可以利用「圖像查詢」功能，搜尋返相片入面見到嘅地標、花草植物、動物品種等等嘅相關知識。

除咗以上新功能外，Apple喺iOS15中亦都會有重新設計Safari瀏覽器、改進Apple地圖、將更多元素加入天氣App、有支援更多功能嘅Apple錢包，同加強私隱等改進。Apple預計iOS15公眾測試版將會喺2021年7月推出，而正式版將會喺稍後，預計9至10月推出。